सुबाष अर्याल

दुई दुई पटक संसद विघटन र अदालतको निर्णयले सत्ता बहिर्गमन बाट रन्थनिएको एमालेले अदालतमा बिचाराधिन मुद्दामा संसद अबरुद्ध गरेको झण्डै ८ महिना पुग्यो । कानुन र संबिधान माथिनै धावा बोल्ने ओलीले चुनाव नजिकिँदै गर्दा गठबन्धनलाई धुलो चटाउने र पुनः एमालेले सत्ताको बागडोर सम्हाल्ने कुरा विभिन्न आमसभामा कार्यकर्तालाई सुनाउँदै आएका थिए ।

६५ प्रतिशत जनमत भएका गठबन्धनलाई धुलो चटाउने ओलीको भाषण कुन स्तरको मजाक थियो भन्नेबारे जान्न उनले अस्ति मात्रै जनताबाट तिरस्कृत कमल थापाको पार्टी संग चुनावी तालमेल गर्ने निर्णय गरेबाटै थाहा हुन्छ । आफुले जे बोले या गरे पनि कार्यकर्ताले ताली मात्रै पिट्ने र समर्थन गर्ने राम्रोसँग बुझेका ओलीले कमल थापा सँग तालमेल गर्दा कुनै बिचार र सिद्धान्त को तालमेल मिल्छ या मिल्दैन त्यो हिसाब लगाएनन् । न त कार्यकर्ताले नै हिसाब लगाए । तर ओली सत्तागठबन्धनको नैतिकतामाथि भने निकै हिसाब लगाउँदै ज्ञान दिईरहेका भेटिन्छन् । ओलीकै संसद विघटन गर्ने कदमबिरुद्ध एकठाउँमा उभिएका गठबन्धनको सरकार बनेको र ओलीलाई पुनः सत्तामा फर्किन नदिने र पुनः असंवैधानिक कदम चाल्न बाट रोक्न भनेर यो गठबन्धन बनेको आम मानिसको बुझाइ छ ।

तर ओली र जनस्तरमा कुनै जनमत नभएका कमल थापाको गठबन्धनको औचित्य चै के हो त्यो प्रष्ट छैन । उक्त गठबन्धन नैतिक हो या अनैतिक ओलीले कार्यकर्तालाई बताउलान् नै । तर सत्तारूढ गठबन्धन चै अनैतिक भएको ओलीले धेरै पहिले देखि कार्यकर्तालाई ब्रिफिङ गर्दै आएका थिए र कार्यकर्ताले ताली पिटेर समर्थन पनि जनाइरहेका थिए ।

काङ्ग्रेस, नेकपा एस, माओवादी, जसपा र जनमोर्चाको गठबन्धनलाई एक्लै धुलो चटाउन तयार ओलीलाई अब बिस्तारै वास्तविक धरातलको बारेमा जानकारी भएको हुुनुुपर्छ ।
गठबन्धनको ठूलै थ्रेट महसुुस गरेका ओली अहिले देशैभर गठबन्धनको लहर देखेपछि झन् अत्तालिन थालेका छन् । सत्ता गठबन्धन सँग डराएका ओलीलाई अहिले कमल थापाको भर पर्नु परेको छ । त्यसैले ‘ओली को डर, कमल थापाको भर’ भन्दा यहाँ उत्तम होला ।